21 juin 2009
QVID AGITVR IN IRANIA ?
Ex quo publice nuntiatus est praesidis electionis exitus, in qua manifeste vicisse declaratus est praesens praeses Ahmadinejad, non destiterunt multi cives aperte reclamare, quibus persuasum est candidatum alterum, nomine Mussavi, qui magis libertati favere dicitur, plura suffragia consecuturum fuisse, nisi fraus ingens adhibita esset. Itaque complura centena milia civium, praesertim juvenum, in viis urbium, et imprimis Teherani, fere cottidie decurrunt, ad impetrandum ut suffragia iterum ferantur.
Sed auctoritates tantum afuit ut has reclamationes audirent, ut omnibus modis, etiam sclopetis, iis finem imponere conatae sint. Frustra, ut videtur. Jam aliquot victimae nuntiantur, quarum luctus clamore magno celebratur.
Quorsum hi tumultus evadent ? Difficillimum est conjecturam facere. Nam quomodo animo fingi potest, aut summum ducem religiosum Ali Khamenei multitudini reclamanti cedere velle, postquam publice declaravit se Ahmadinejad praesidem honeste electum existimare, aut contra has catervas juvenum qui in viis exclamant : “Pereat dictator !” subito obsequenter domum redire et quietos posthac se praebere ? Neutrum mehercle verisimile videtur…Praeterea hic status rerum tumultuosus diutius durare minime potest.
Nobis quidem tantum exitus exspectandus est, dum speramus victoriam alterutrarum partium minime cruentam fore.
Pastrix
14 juin 2009
DE ELECTIONIBUS EUROPAEIS
In tota Europa electiones ad delegatos in Parlamentum Argentoratense mittendos proxima hebdomade factae sunt. Infortunate plurimum abest ut omnes cives senserint hanc electionem sua interesse, nam plus quam quadragesimae centesimae eorum abstinuerunt ne suffragium suum ferrent.
Sed, quod contra omnem exspectationem evenit, fere ubique partes dextrae quam sinistrae fortiores se praebuerunt, contra exspectationem dico, nam post crisin pecuniariam quae nuper accidit et calamitates quae maxime classes populares inde affecerunt, a multis exspectabatur fore ut hae quidem classes partes dextras punire vellent quae semper divitibus cum detrimento pauperum favere dicuntur. Sed non ita res se habuit, at contra sinistrae partes fere ubique victae sunt. Aura popularis ! Virides soli, qui dicuntur, numerum delegatorum auxerunt.
An democratia socialis in Europa jam mortua est ?
Pastrix
07 juin 2009
DOMVM REDII
Domum redii
Nunc denique tandem domum redii, postquam totum mensem in nosocomio jacui, sectinem chirurgicam exspectans, quae in fine non facta est. Equidem vehementer moveor cum commentarios vestros, carissimi amici, lego, quibus sollicitudinem vestram declaratis de valetudine mea. De medicorum manibus me expedivi, et mihi tantum restat ut aliquot medicamenta cottidie sumam. Fessus quidem, sed nequaquam invalidus aut infirmus.
Hodie etiam suffragium meum dedi ad electiones legumlatorum Europaeorum, non quod mihi persuasum sit vocem meam magni momenti fore ad Europam efficiendam meliorem quam nunc, sed quod nunquam in mea vita a suffragio dando me abstinui. Non intellego cur in Gallia, tanquam in aliis civitatibus Europaeis, suffragium dare lege necessarium non sit. Nam, quanquam in democratia, quae dicitur, fortasse multa incommoda insunt (nonne recte Seneca ajebat, “Non tam bene cum rebus humanis agitur ut meliora pluribus placeant” ?), sed quamdiu, ut in Republica Platon optabat, non sunt philosophi qui res regunt, nobis necesse est democratiam probare, ut minime malam civitatis formam.
Iterum gratias ago infinitas omnibus qui de absentia mea sollicitos se praebuerunt, et promitto me opportunitatem alicujus rei scribendae omni hebdomade posthac non omissurum, ut hactenus solebam.
Valete.
Pastrix
26 avril 2009
"FLVMEN SINE RECVRSV"
Mementote, Galli, Gallae : Ubi primum, mense Majo MMVII, novus Administer Primarius a Praeside Caudice munus suum accepit, orationem gravissimam habuit in televisione coram populo Gallico, in qua, inter alia, nuntiavit “arcas, (id est aerarium), publicas vacuas esse, et Rempublicam ipsam in periculo versari decoctionis . Quamobrem non oportere ab ea peti aut exigi quicquam, at contra necesse esse pergere severam deminutionem sumptuum publicorum , et imprimis numeri officialium”
Aliquot mensibus post, omnia mutata sunt. Argentariae, et societates assecurationis , quae, sua culpa, ut videtur, ingentes pecunias perdiderunt, primum in America, et mox in Gallia et reliquis terris , a Rebuspublicis suis petierunt ut compensarent jacturas suas, ne mergerentur. Ex eo tempore, cottidie audiebamus , attoniti et paene vertigine correpti, hic iis erogatos esse duos biliones Dollarorum, illic viginti, In Gallia autem non memini quot Caudex noster magnanimus iis donaverit biliones Euronum. Sed nonne mirum est quod arcae publicae quae, si cives aliquid petebant, vacuae nuntiabantur , subito, operatione quasi magica, satis plenae factae sunt ut pecuniae ingentes ex iis tam facile dejici possent in flumen sine recursu…?
Pastrix
19 avril 2009
EPIGRAMMATION
Caudicis jactantia
“Sum sapientior illa(1), expertior illo(2),
--Stultus tertius (3) est : unus eos supero.
Ut Rex Sol Lodoïcus, sum ‘nec pluribus impar’,
--Orbe potens solus pellere sum tenebras”
(1) Angela Germana (2) Barack Americanus (3) Josephus-Ludovicus Hispanus
11 avril 2009
PERTINETNE TVRCIA AD EVROPAM ANNON ?
Quoties de insertione Turciae in Unionem Europaeam agitur, prima quaestio quae animo incurrit est pertineatne (geographice) haec terra ad Europam annon. Nam majorem ejus partem extra fines Europae constat exstare, minorem solum intra eos. Itaque identidem controversia acerrima movetur inter eos qui hanc terram re ipsa Europaeam esse censent et eos qui eam prorsus non esse
opinantur. Argumenta varia, praeter illud argumentum geographicum, utrique afferunt ut sententiam suam defendant :
-religiosa : qui contra sunt, affirmant Europam quae semper ad religionem christianam pertinuit nationem includere non posse cujus populus fere totus religionem aliam colit, scilicet islamicam. Quibus fautores Turciae respondent primo exstare intra Europam ipsam alios populos islamicos, in Albania, in Kosovia, in Bosnia, exempli gratia ; secundo insertionem nationis islamicae in Europam multum prodesse posse ad conjunctiones inter civitates occidentales et orientales faciliores reddendas , Turcia quasi juncturam faciente inter duos mundos qui inter se non semper bene intellegere solent.
-politica : alii enim affirmant Turciam nondum esse veram democratiam neque omnia hominum jura observare, ut nationem candidatam ad Unionem Europaeam decet. Alii, contra, dicunt eam jam multum in hoc conexu profecisse, et insertionis Europaeae beneficio, statum optatum brevi tempore assecuturam
-demographica : numerus Turcarum vix inferior est Germanorum numero et ceteris civitatibus haud paulo superior; itaque multi timent ne insertio tantae molis subita in Europam efficiat ut aequilibritas inter varias civitates vix et aegre stabilita non sine dissessionum periculo amittatur.
Ad summam, cum aliquot abhinc diebus Barack Obama ab rectoribus Europaeae urgenter petiisset, ut Turciam in Unionem Europaeam acciperent, multi assensi sunt, at Caudex noster, tam superbe quam Asterix Gallus cum Caesari resistit, asseveravit hanc quaestionem non ad Obamam sed ad Europaeos ipsos solum pertinere, atque se ipsum insertionem Turciae in Unionem Europaeam nunquam omnino approbaturum. Praeter eum nemo ex rectoribus Europaeae tam pertinaciter sententiam suam de hac re protulisse videtur. De populis vero ipsis consulendis, quis cogitat ?
Pastrix
06 avril 2009
CHRONOGRAMMA BREVISSIMUM MMIX
MIserI MIserIores erVnt
Pastrix
29 mars 2009
EPIGRAMMA
DE MVTATIONE HORAE
Horologi indicibus motis hora subito una
--Veris nobis jam pars hodie periit
Quam si reddiderint hiemis jam tempore saevo,
--Tanquam pro mero, si tibi detur aqua !
Pastrix
22 mars 2009
EPIGRAMMA
IN MALEDICTVM PAPAM sive : FVTVANT, NEC TEGANTVR !
Letifera decimatur et immerita Africa peste
--Quae per concubitum serpit et interimit ,
Contra quam nil inventumst aliud quam mentula tecta,
--Quod reprehenditur ex Pontificis cathedra ,
Quod per concubitum spectandumst nil nisi proles.
--Si ibidem transit virus et vita simul,
Non satius servare homines quam gignere fetus ?
--Papa autem renuit : Ne futuant igitur !
Sin autem futuunt, futuant, volo, pene soluto,
--Tegmine semoto! Sic Domino placuit !
Pastrix
15 mars 2009
DEVS DIGNOSCET SVOS
Ingens tumultus excitatus est proximis diebus in Ecclesia Catholica, cujus causae erant duae : prior fuit controversia quam movit episcopus quidam natione Britannica, sed in Argentina sedem suam habens, cum in dubium vocavit Judaeos, qui, Belli Mundani alterius tempore, a Germanis interfecti sunt, necatos esse in conclavibus in quae vapores mortiferi adducti erant, et se putare declaravit eos mortuos quidem esse, sed fame, labore, frigore, cruciatibusque omnis generis, non tamen talibus conclavibus utendo. Ergo controversia erat non de re ipsa, quae est internecio Judaeorum, de qua nemo dubitare potest, etiamsi quidam credunt numerum victimarum multum a Judaeis ipsis auctum esse, sed tantum de modo eos interimendi. Eratne haec res satis magni momenti, ut omnes circulos Ecclesiae disturbaret et commentarios in fere omnibus orbis partibus suscitaret ? Eo magis quod ille hanc opinionem non ut episcopus ex cathedra sua praedicans, sed ut civis privatus ore libero protulerat. Ne plura, homo coactus est relinquere sedem suam in Argentina et in Britanniam reverti ubi persona minime grata acceptus est. Quin immo propter idem haud longe afuit, quin Papa ipse cogeretur iter omittere vel differre quod in animo habebat in Terram Sanctam (ut aiunt) brevi facere. Attamen quid ad theologiam vel ad religionem omnino pertinet, quibus modis interfecti sint quos utcumque universi homines consentiunt barbarice tractatos necatosque esse ?
Altera controversia quae nuper mota est intra Ecclesiam dignior esse quidem videtur quae fidelium animos disturbet. Acciderat enim in Brasilia ut puellula novem annos nata, quae a matris suae marito vi et violentia stuprata erat, gravida fieret, et, propter aetatem ejus teneram et periculum in quod adduci posset si partum ederet (eo magis quod is constare ex gemellis duobus compertus erat), mater puellae a medicis impetravisset ut ejus abortum procurarent, quod per legem civilem in tali casu licebat. Hac re vix cognita, episcopus loci publice declaravit matrem, filiam totumque globum medicorum et nosocomorum qui operati essent excommunicandos esse, sed non eum qui puellam stupraverat, nam hic peccatum grave quidem commiserat, sed abortio sola excommunicatione digna erat. Quo edicto statim a cardinale quodam in Vaticano probato et laudato, permulti non solum fideles, sed etiam episcopi ipsi, praesertim in Europa, publice reclamarunt, et ad Papam provocarunt, qui adhuc respondere fortasse non audetur, quod facile intellegitur, nam si ratio theologica habenda est, recte quidem sine dubio statuit episcopus Brasiliensis, sed interea misericordiae et considerationis miseriarum humanarum, quarum exempla multa attulit is cujus religionem profitetur, omnino oblitus esse videtur…
Deus dignoscet suos
Pastrix