EO RVS
Vt feriarum tempore plerumque solemus, ego cum familia rus ituri sumus, ut hos quindecim dies feriarum vernarum agamus in villula nostra in Alpibus septentrionalibus sita. Utrum illic interreti uti mihi liceat, ut nuntios meos mittere pergam necne, nondum scio. Utique conabor, et spero hoc mihi bene successurum…
Dum de interreti loquor, vos, optimi lectores et lectrices, rogare volo, num his proximis diebus NEMINIS-OUDENOS, amici nostri Americani, blogum visitare conati sitis. Quod ad me pertinet, quotiescumque conor, in ordinatri mei ‘quadro’ apparent haec verba, Gallice scripta: “Ad blogum hoc legendum invitari non videris. Si de errore quodam agi existimas, tibi suademus, ut hujus blogi auctorem adeas et ab eo invitationem petas”
Nonne hoc omnino mirum et singulare ? Quid sibi vult hoc subitum arcanum ? Utrum mihi soli hoc acciderit, an aliis quoque lectoribus, scire vehementer cupio. Ergo invitatio petenda erit, ut nuntios amici nostri NEMINIS legamus ?... Nihilominus adire auctorem blogi, ut me ‘illi’ ( ?) hortabantur, conatus sum, sed frustra…
Si forte NEMO ipse haec legerit, vehementer opto, ut nos certiores faciat, quo modo adire blogum ejus valeamus, nam equidem usque adhuc haud raro in id oculos conicere solebam, ut scirem num quid novi auctor scripsisset, quod cum plerisque aliis blogis Latine scriptis me facere solere libenter fateor…
Pastrix
/https%3A%2F%2Fassets.over-blog.com%2Ft%2Fcedistic%2Fcamera.png)