saDDaMVs obIIt

Saddamus Hussein, prior praeses Iraquiae, ultimo die anni modo praeteriti suspendio interfectus est , ipso die festo Muslimorum qui toto orbis terrarum, sed praesertim Meccae in Arabia, celebrant anniversarium ultimae peregrinationis quam Mohammadus paulo ante mortem suam perfecit in hanc urbem (tunc enim temporis non illic, sed Medinae in urbe habitabat). Non quidem forte elegerunt judices Iraquiani eorumque domini Americani hunc diem festum quo de Saddamo supplicium sumerent. Certe voluerunt omnibus Muslimis in toto orbe ostendere, se fidem et religionem eorum non flocci facere. Macti animo, Americani, quid dicetis si aliquando de aliquo principum vestrorum idem supplicium sumetur a Muslimis die Nativitatis aut die quem vocatis 'Gratias agendi' ? Quod equidem omnino non opto (quippe qui alioqui poenam capitalem omnino non probem), haud magis quam optabam ut numerus militum vestrorum in Iraquia interfectorum tria milia ante anni finem expleret . Sed ita in bellis res eveniunt: vis vim pariat, omne facinus ad ultionem vocat... Quod ad Saddamum ipsum pertinet, supplicium suum firmo animo et sine ullo tremore tulisse videtur, quod fortasse hominibus adhuc partium ejus studiosis animos addetur, ut 'martyrem' suum ulcisci etiam magis cupiant. Facilius semper fuit bellum incipere, quam finire ... Qualis annus novus tibi erit, Frutex ? Horribilis ? ut quondam dixit Regina Elisabetha ? Valete in crastinum, optimi lectores et lectrices, et novum annum quam secundissimis auspiciis inaugurate. Pastrix