Difficultates...

Heri vesperi mittere nuntium meum cottidianum non potui. Cur ? Nescio. Mihi enim accidit quod adhuc nunquam mihi acciderat, Lutetiae saltem. Nam cum ruri essem et mihi utendum esset telephonica linea ad interrete adeundum, hoc genus difficultatis vere perincommodum haud raro eveniebat. Sed Lutetiae, ubi systemate utor multo efficaciore, hoc exspectandum non erat. Quid enim evenit ? Quoties muris mei indice situm 'canalblog', ubi diarium meum hospitio accipitur, quaerebam, toties in quadro ordinatri inscribebatur Anglice 'Not found' id est 'Inveniri non potest'. Conexionem efficere impossibile videbatur. Et hic rerum status non duravit minus quam horam totam ! Omnes conatus mei inutiles erant. Frustra diversos modos operandi experiebar, simulabam me alium situm quaerere, sperans hoc dolo daemonem malignum, si quis in culpa erat, fallere, sed nullus dolus, nulla astutia, nullum stratagema unquam bene succedebat. Quis deus vel dea interreti praeest ? Mercurius, qui commercio et communicationi inter deos sed etiam inter homines favet ? an Diana, venatrix, retibus et sagittis utendi callida ? An Bastet, dea Egyptiorum cum felis capite, mures indociles domandi perita ? Utcumque res se habet, tutius erit omnes tres precari, ne tale incommodum iterum mihi accidat ? Valete, et mecum precamini, carissimi fratres et sorores. Et dormite bene. Pastrix

Comments

[Pastrix]

Si omen est malum, absit, absit, absit ! Si autem est bonum, adsit, adsit, adsit !

[Nemo]

Fortasse Mercurius praeest, quia deus scientiae arcanae est; nonne sunt nuntii de erroribus interretialibus saepe secretorum arcanorum pleni?

Sed fortasse errores ipsi sunt omina ab deis missa; itaque, si verum est, quomodo talia omina interpretari debemus?