16 juin 2006
Nox erat...
"Nox erat, et toto fulgebant sidera mundo" Ecce versus quem elegi hodie ex Iliada Latina illa, de qua egregius amicus noster Caputsaxiens heri locutus est. Eam enim facillime inveni, adjuvante excellenti benefactore nostro nomine Google. Gratiae ei agantur debitae, necnon Caputsaxienti, sine quo ego quidem nunquam hoc opus egregium cognossem. Subito textum ejus transtuli ad ordinatrum meum, et summo cum studio legi. Dicitur illa Iliada Latina conscripta esse Nerone vivo, id est circa annum 65 p.C.n ab auctore ignoto. Sed fateor hoc opus jucundissimum lectu mihi visum esse. "Nox erat..." Homerus, neque ille Graecus, neque hic Latinus, mentionem fecit Reginae Noctis. Infortunatus uterque, qui eam non cognovit ! Nos ditiores sumus quam vetus Poeta. Habemus nostram Reginam, quae singulis noctibus nos visitat in somno. Quae et qualia somnia nobis illa fingit ! Tam multiformis quam antiquus Proteus, tam magica quam callida Circe, tam blanda quam canorae Sirenes, ex Regina Noctis, facta est regina noctium nostrarum... Veni, nox gratissima, et nobis fave somniis dulcibus..
Valete, amici et amicae, ad crastinum...
Pastrix
Publicité
Publicité
Commentaires
T
R
L
R