Tempora mutantur

"Tempora mutantur, nos et mutamur in illis". Hoc proverbium citasse primum fertur Imperator Germanicus Lotharius (840-845). Postea Johannes (John) Owen, anno 1615, addidit ei alterum versum, quo significabat suum 'pessimismum' ('Pessimista' homo est qui semper exspectat res pejores fore in futuro, quam nunc). Hic versus erat : "Quomodo? Fit semper tempore pejor homo". Quid diceret si nunc temporis viveret ! Sed hujus proverbii mentionem feci non in hanc sententiam. Tantum habebam in mente, ab hac nocte, in Gallia et fortasse in aliis regionibus Europaeis, novam horam, quam vocant aestivam (quanquam hic quidem tempestas omnino non est aestiva), in usu fore. Etenim hora secunda exacta post mediam noctem fiet, quasi virga quadam magica operante, hora tertia. Omnia horologia, privata, publica, muralia, armillaria, in autocinetis, in cubiculis, in stationibus ferriviariis, etc. debebunt 'promoveri' una hora. Sol ipse non poterit non oboedire serviliter gubernatoribus et posthac orietur occidetque una hora posterius ! Ut dicunt: melius posterius quam nunquam!!! Nos vero hac nocte, si hora solita e lecto surgere volemus, una hora minus dormiemus, quam tamen proxima hieme compensabimus... Sed fortasse haec mutatio temporis ad vos, optimi lectores, non pertinet.. Valete, et dormite tam diu quam optatis. Pastrix