Veni, o ver !

Salvator, ex Insulis Canariensibus, me rogat qualia sint caelum et temperatura Lutetiae. Ea fateor nunc non esse tam jucunda. Hiems saevit hic magis quam unquam. Novem tantum diebus ante initium veris, nunquam tale frigus passi sumus. Quasi ventus quidam ex Siberia flaret usque in regiones nostras. Quid accidit veri ? Cur tam lente venit ? Non quod oderimus hiemem, nam hiems ipsa habet suas virtutes et commoda, et bene scimus nos vivere in zona temperata dicta, ubi tempora anni alia aliis succedunt, aestas veri, hiems autumno, sed hoc anno nimis diu durat hiems, quasi ver nunquam esset venturum. Quando poterimus cum Horatio canere: "Solvitur acris hiems grata vice veris et Favoni" ? Fortunatos Canarienses, iterum dicam, qui fruamini fere eadem temperatura per totum annum ! Talis est, optime Salvator, status rerum Lutetiae, quod quidem ad tempestatem pertinet... Si tu voles nos visitare, te hortor ut aliud anni tempus eligas ! Omnibus lectoribus et lectricibus salutem dico plurimam. Valete ad crastinum... Pastrix P.S. Heri Saturni die spectaculo cuidam adfui, unde domum redii multo post mediam noctem, ita ut aliquid scribere in diario oblitus sim. Mihi ignoscite, quaeso.