Cavete aëroplana !

Modo audivi nuntium valde mirum : hora tertia post meridiem Novi Eboraci (in Gallia hora erat nona) aëroplanum parvum dicitur se elisisse in unum ex illis aedificiis altissimis quae caeliscalpia vocantur. Nemo dicere potest utrum hoc casu fortuito evenerit, an id sit a tromocratis novum facinus admissum. Quin immo, si testibus statim post casum interrogatis credimus, plerique negare videntur se ullum aëroplanum vidisse, neque scire quomodo hic casus evenerit. Utcumque res se habet, vidimus (per televisionem) flammas ingentes et fumum crassum ex fenestris unius ex tabulatis exeuntes, sed nemo invenisse videtur ullum aëroplani fragmentum humi jacens. Hoc spectaculum videns quis non meminerit diem 11 m.Sept. a.2001 ? Usque adhuc tamen nullus tromocratarum grex hujus facinoris 'gloriam' sibi vindicavit. Sed nullus est, puto, Neo-Eboracensis qui non miretur, quomodo cuilibet aëroplano, licet parvo, supra unam ex frequentissimis in orbe terrarum urbibus tam libere, tam solute, volare licuerit.... Valete, optimi lectores et lectrices, et somniate dulcissima domnia. Pastrix