2 août 2006
Tempestas
Subito tempestas in nostra regione mutata est. Post dies haud paucos vere caniculares, vix tolerabiles (quales sunt nunc, si nuntiis ex America allata credimus, in California et mox Novi Eboraci), temperatura, post aliquot dies procellis et tonitru et fulgore notabiles, facta est fere frigida, quam credideris autumnalem ! Vicissitudines tempestatis sunt, quasi vicissitudines fortunae, fortiter et patienter tolerandae. Cedere iis necesse est. Nihil prodest conqueri, vix decet mirari. Nos certe, progressus technarum beneficio, non severe patimur: omnes mutationes temperaturae moderamur, sive calidior fit, aëre frigido per instrumenta afflato, sive frigidior, domum calefaciendo. Sunt, infortunate, aliae regiones terrae, ubi talia commoda non inveniuntur, sed eas adjuvare perdifficile est, praesertim si ibi bellum aut seditio saevit... Si dormire quiete volumus, satius est struthocamelum imitari (animal placidius quam crocodilus!) et, capite nostro in arenam immerso, quae alibi geruntur, (nisi remedium aliquod malis afferre non possumus) prorsus ignorare, aut, ut illi tres simioli, nihil videre, nihil audire, nihil dicere...
Valete in crastinum, optimi lectores et lectrices, securique et tranquilli dormite, atque dulcia somniate somnia.
Pastrix
Publicité
Publicité
Commentaires
P
M
R
R