Anniversarius felix

Hodie celebrandus est anniversarius singulariter felix: etenim die 11 m. Febr. 1990, e carcere ubi inclusus erat a magistratibus injustis et "melanophobis" ante 27 annos, exibat Nelsonus Mandela, heros omnium qui rassismum et separationem phyleticam oderunt. Per illos 27 annos, quanquam judices quasi perpetuo libertatem ei offerebant ea sola condicione ut certamen suum aequalitatis causa inter nigros et albos susceptum repudiaret, nunquam e proposito suo decessit, donec custodes, perseverantia ejus lassati, eum emiserunt senem, qui in carcerem juvenis intrarat, sed integrum vitae scelerisque purum (ut ait Horatius) , corpore quidem debilitatum, sed animo fortiorem quam antea. Ita ut, paucis annis elapsis, praeses Africae Meridionalis civium suorum suffragiis creatus sit. Sed contra ac plerique praesidum, non solum in Africa, sed in plurimis civitatibus orbis terrarum, facere solent, in sella (vel cathedra) sua principali non inhaesit, atque, mandato suo quam optime gesso, cum rem publicam satis bene compositam et libertatem aequalitatemque firmiter intitutas vidisset, candidatum ad summum magistratum se ostendere noluit, sellamque successori reliquit. O hominem non minus mirandum in rebus secundis quam in adversis, in summa potestate quam in turpi custodia, in aetate extrema quam in florenti juventute ! Valete in crastinum, et vesperam jucundam habete. Pastrix

Comments

[Pastrix]

Salve, Mr Kaplan, alias Lluis. Valde gaudeo quod diarium meum libenter legis, et tibi gratias ago maximas pro gratulationibus tuis. Vale, care amice.

[Mr Kaplan]

Salve Pastrix,
Quo modo te habes? Mihi nomen est Lluis (Mr Kaplan in Interrete) et Barcino incolo (sum igitur catalanice). 41 annus natus. Ego sum "biologus" iampridem sed fessus sum de biologiae et altera scientae. Ob eam causam, anno praeterito incepi linguam latinam discere. Idcirco bloga tua libenter lego fere quisque diem. Tibi congratulor. Ut mea fert opinio optime latinus scribere (aut loquere) numquam valebo.
Simul filius (4 annus natus) et filia (7) cubitum eunt ordinatrum "portatile" sumpso et latinam studet exercebo. Quantus labor!

Iterum, gratulationes meas accipite. Opto tibi noctem bonas (bona nit sicut dicitur in catalanice!!)