Animalibus, non hominibus

In actis diurnis hodie publicatis legi nuntium qui admirationem movere debet : Asssociatio quaedam Isrëliana juribus animalium tuendis dedita impetravit a civitatis suae rectoribus ut murus continuus interrumperetur, qui Palestinienses ab Iraëlianis dividit, intervallo triginta chilometrorum. Nemo est qui non audierit de illo muro turpissimo qui, ingenti sumptu, exstructus est, ita ut multis locis etiam terras agricolarum Palestrinensium arabiles complecteretur, et aliquando ab agris suis aut a schola sua vici aliqui dividerentur... Quod aliquot reclamationes in illa famosa 'communitate internationali' excitavit, sed haud diu, nam, ut ait proverbium, 'clavus clavo ejicitur', et tot novae causae reclamandi cottidie oriuntur in hac vel illa parte orbis terrarum, ut quod clamores hodie suscitavit, crastino die in oblivionem obruitur. Quoquo modo, num Israël aut ejus tutor Americanus illius clamorum generis rationem unquam habuerunt ? Attamen murus iste interruptus est intervallo triginta chilometrorum ? Qua de causa ? An quo vita Palestinensium fiat melior et facilior ? Minime. Sed animalium ferorum causa, ut per illud intervallum transire possent, sive ad vescendum et potandum, sive ad coeundum cum congeneribus suis !! O fortunata nimium animalia, quae libertate commeandi summa in illa terra fruamini, ubi incolis ipsis (bipedibus) aliquando non licet, nisi per claustra, agros suos aut scholam suam adire !! Valete, optimi lectores et lectrices, dormite bene, et somniate de mundo in quo homines haud minore observantia fruantur quam animalia ! Pastrix