latine

IO TRIVMPHE !

Pastrix — Thu, 10 May 2012 09:54:56 GMT

Habemus novum praesidem in Gallia. Abiit tandem iste bellator, Fruticis socius, librorum instudiosus, nationis divisor, peregrinorum hostis, adversariorum arrogans contemptor, Tsiganorum vexator, divitum amicus, pauperum despectator, Ecclesiae obsequiosus. Accessit ad sellam praesidentialem vir civilis, pacificus, modestus, pauperum curator, divitibus diffidens, peregrinorum defensor, a religione alienus. Diutius pati non poteramus istum inurbanum hominem, qui linguam nostram corrumpebat, officia publica etiam penitus vastavit, ad educationem, ad valetudinem, ad commeatus pertinentia ! Abeat in malam crucem cum meretrice familiaque sua ! Nescio mehercle quid facturus essem, si iterum electus esset ad quinque alios annos ? Sed diis deabusque gratias plerique nostrum agimus quod a Caudice liberati sumus.

Vtinam sit praeses novus Reipublicae beneficus et patriam nostram inter nationes erigat et exaltet !

Pastrix

DE SANCTO VALENTINO

Pastrix — Tue, 14 Feb 2012 14:50:27 GMT

Hodie celebrat Ecclesia Catholica sanctum Valentinum, patronum amantium juvenum caelestem. Hac opportunitate utentes, in multis terris, centena milia adulescentium utriusque sexus munuscula et oscula inter se commutare solent, ad amorem suum mutuum significandum. Sed rogabit aliquis : “Quis erat ille Valentinus, qui tali celebritate fruitur ?” Sunt responsa varia ad hanc interrogationem : alii dicunt eum fuisse episcopum qui, filii philosophi cujusdam nomine Cratonis caecitate miraculo sanato, effecit, ut tota familia Cratonis ad fidem christianam converteretur, quod ita iram praefecti Vrbis movit, ut Valentinum capite puniret. Alii vero tradunt eum fuisse sacerdotem qui in matrimonium juvenes inducebat, quod eos impediebat ne milites fierent et pro Imperio Romano pugnarent. Quod principem, qui erat Claudius II, Gothicus cognominatus, tertio saeculo p.C.n, ita exasperavit, ut capite eum damnaret. Cur ergo hic vir, sive miraculum fecit, sive ad matrimonium juvenes exhortatus est, patronus amantium factus est, multis saeculis post mortem ? Plerique peritorum putant probabiliorem causam esse, quod dies, quo celebratur, congruit cum Lupercalium die, quo olim juvenes Romani, nudi, per vias Vrbis bacchabantur, flagellis ferientes matronas et puellas obvias, quae saepe ictibus eorum sese offerebant, sperantes tali ritu mox praegnantes factum iri. Aliud exemplum ritus pagani ab Ecclesia Christiana, ut ita dicam, baptizati, ut, puta, Nativitas Jesu, quae congruit cum die, quo celebrabatur Sol Invictus…

Sic religiones quasi cursores inter se lampada tradunt !

Pastrix

CVR NVNC DEMVM ?

Pastrix — Mon, 30 Jan 2012 16:55:55 GMT

Heri iterum praeses noster sermonem habuit cum duobus diurnariis ex asseclis suis coram Gallabus et Gallis (ut dicere solet) per televisionem, ut novissima sua proposita ad restituendam Galliam exponeret post illam crisim, ex qua, ut autumat, beneficio suo mox exituri sumus. Quae proposita vix tribus mensibus profert ante proximam electionem praesidis Galliae, mense Majo, cum ipse se candidatum professurum esse nondum declaravit, propterea quod “officium sibi proposuerit tuendi cives, usque ad muneris sui finem, ut praeses, ab incommodis crisis”. Sed haec proposita, ut videtur, ante tempus diuturnum, vel etiam annos, nihil proficere necesse est. Si vere Galliae prodesse debebant, cur ergo ea non proposuit antequam muneris ejus finis appropinquet? Voluit, credo, nobis persuadere quinque annos non satis sibi fuisse, et quinque annos amplius sibi largiendos esse, ut summam manum operi suo immittere sibi liceat. Sed neminem fugit his quinque annis decies centena milia hominum opere carentibus addita esse, numerum autem pauperum in viis urbium mendicantium valde auctum esse et in dies plures homines tenuiores desperatione affici. Ergo eine confidendum est , qui fere in omnibus rebus adhuc exspectationes nostras decepit, cum nobis maria montesque, ut dicitur, nunc pollicetur ?

Pastrix

ANNVS NOVVS

Pastrix — Sat, 17 Dec 2011 17:23:42 GMT

Jamjam nunc patet ancipiti nova Janua Jano

Sit felix annus, Lingua Latina, tibi !

Pastrix

QVOMODO VALET MVNDVS ?

Pastrix — Mon, 03 Oct 2011 14:34:28 GMT

Quomodo valet mundus ?

Responsum : Pessime, Dominae, Domini ! Etenim si ad statum mundi rerum materialem respicis, vides stratum ozonis perforatum et radios solis mortiferos ad terram permittens, vides naturam caeli in pejus mutatam et ita calefactam, ut aliquando glacies polorum liquefacta augere possit maris aquam ad mergendas insulas et urbes multas prope litora sitas, vides terrae motus et procellas turbinesque ingentes vastantes civitates , vides morbos et pestilentias inauditas delentes populos innumerabiles, et simul eodem tempore homines fere ubique terrarum sicut lupos invicem trucidantes. Sed ad haec addendus est pessimus status rerum socialium : passim gubernantibus multitudines reclamant, quod nimis argentariis tyrannis obtemperent ; ubique inter pauperes et divites in dies magis interest cum in diversis nationibus tum in eadem civitate, ita ut fere ubique plebs novarum rerum cupidam se praebeat ; corruptio principum ubique res publicas quodam modo putrefacit, suffragia populi adulterantur, passim tyranni potestatem suam per fas et nefas tueri conantur. Quid plura ? Mundus videtur tam aeger ut nemo jam sciat quis medicus quibusque medicinis eum curare, nedum sanare, possit.

Quid tum ? Estne desperandum ? Equidem non puto. Tantum spero populos, non principes, modum ex hoc angiportu exeundi invenire posse, maximam rerum eversionem universam faciendo, qua denique tandem res perversae in rectam viam reducantur, et concordia inter homines et naturam instituatur. Amen.

Pastrix

DE DIE QUARTODECIMO MENSIS IVLII

Pastrix — Sun, 17 Jul 2011 09:12:14 GMT

Die quarto decimo mensis Julii quotannis celebrari solet anniversarius Maximae Rerum Mutationis Gallicae, quae evenit anno millesimo septingentesimo octogesimo nono (MDCCLXXXIX), cum populus Bastillam, castellum Lutetiae situm, expugnavit, carcerem ingentem, sed tunc temporis fere vacuum, quod vulgo signum despotismi regis Galliae habebatur. Populus, vel potius plebs, hanc seditionem fecit, non factio quaedam militaris, ut evenit in aliis civitatibus. Nullus dux, nullus miles in causa erat, sed turba tumultuosa, quae milites Helveticos, qui Bastillam custodiebant, cum resistere conati essent, omnes trucidavit. Cur igitur celebratur hic dies festus decursu ingenti militum, armorum, curruum cataphractorum, in via quae inscribitur Campi Elysii, coram praeside et plerisque ministris Reipublicae, dum aëronaves pugnatrices caelum fragose sulcant ? Hanc rem in quaestionem heri vocavit una ex candidatis, qui Reipublicae rectionem petunt, sub titulo Ecologistarum, nomine Eva Joly, quae, origine Norvegiana, Galla jamdudum facta est. “Etenim, inquit, in terra mea pristina, dies festus nationalis celebratur puerorum puellarumque, civium ad omnes classes pertinentium, senum, etc, pacifico decursu, non militum ut in Gallia. Cur ita non fieret hic, si praeses electa ero ? ” Statim undique conclamatum est adversus hoc propositum in omnibus partibus politicis Gallicis, dextrorsum quidem, sed etiam sinistrorsum, et addidit Primus minister istam dominam non aptam videri ad intellegendos mores Gallicos, cum ipsa non sit a Gallia oriunda. Quod responsum conclamationem aliam partium sinistrarum excitavit, quod Primus minister nostrae Reipublicae principia oblitus esset, quae praecipiant ut omnes cives, cujuscumque sint originis, aequi habeantur et iisdem juribus sine discriminatione fruantur.

Ego ipse me opinionem nullam certam habere fateor de hac quaestione, sed dominam Evam Joly non reprehenderim, nam ejus propositum dignum mihi videtur, cujus ratio habenda sit, cum ejus tempus advenerit.

Pastrix

FATVM ROMAE

Pastrix — Sun, 19 Jun 2011 15:12:00 GMT

Heri in televisione Gallica, a “catena” (ut ajunt) c.t. ARTE diffusa est pellicula quae FATVM ROMAE inscribitur. In qua narrantur res quae evenerunt a caede Caesaris usque ad pugnam Actiacam, id est ab anno quadragesimo quarto ad annum tricesimum primum a.C.n., quod est temporis intervallum quo Romae potentia de Senatorum (et Populi) manibus ad tres, mox ad duos, denique ad unum virum collata est. Etenim post Caesarem interfectum a Bruto et Cassio, Marco Antonio bene successit ut rerum potiretur, una cum Octaviano adulescente, Caesaris pronepote, et Lepido, ejus magistro equitum. Brutus et Cassius Roma fugerunt et exercitum ingentem in Graecia confecerunt, quem Marcus Antonius et Octavianus oppugnare constituerunt. Acriter pugnatum est apud Philippos, Macedoniae urbem. Primo proelio victi sunt Antonius et Octavianus (qui aeger in tabernaculo manere debuit). Sed Cassius, victoriae non confidens, sibi manus attulit. Secundo proelio Brutus, qui potius philosophus quam dux erat, victus, se interemit, clamans : « Virtus, non es nisi nomen ! ». Post hanc pugnam, ubi plus quam triginta milia civium Romanorum mortem obierunt, Antonius et Octavianus inter se imperium Romanum partiti sunt : huic pars Occidentalis, illi Orientalis tributa est. Postea Antonius Tarsum, Ciliciae urbem, profectus est, ubi eum convenit Cleopatra, Aegypti regina. Primo congressu inter eos amor ardens natus est, et posthac Antonius in Aegypto apud Cleopatram “vitam illam inimitabilem” egit, quanquam interea uxorem duxerat Octaviam, Octaviani sororem, quod reconciliationem inter duos viros significare debebat. Denique tandem iterum bellum inter eos ortum est, quod pugna navali apud Actium in Epiro, Antonio et Cleopatra victis, finitum est. Antonius, in Aegyptum reversus, se interemit, quem mox imita est Cleopatra. Sic Octavianus princeps factus est solus, Rei Publicae imagine et specie tamen servata.

Haec sunt res in pellicula ostentae, duabus pugnis imprimis optime descriptis, per rationes omnino novas technologiae hodiernae, quae “numerica” vocatur, et potestatem facit mutandi imagines “virtuales” quae dicuntur in res vel homines quae plane veri spectanti videntur. Quae rationes in fine pellicula abunde monstrantur.

Sed mihi restat ut dicam cur haec pellicula mihi tantum placuerit, et quid novi in ea faciat ut dignior visu videatur, quam omnes aliae quae antiquitatis res narrant. – LINGVA qua utuntur actores fabulae ! Nam non Anglice, non Gallice loquuntur, sed LATINE et GRAECE. Nonne permirum est ? Itaque non possum quin vehementer omnes Latinistas hortar, ut videre conentur hanc pelliculam, quam in multis aliis terris monstratum iri audivi.

Pastrix

DE DOMINICO S.K.

Pastrix — Sun, 22 May 2011 16:09:55 GMT

Postquam tot homines de casu Dominici S.K. in variis linguis et diversis modis nuper scripserunt, et praesertim post eos qui Latine id fecerunt (NEMINEM dico et ICONOCLASTEM in primis), me facere non posse quin ipse opinionem meam exponerem censui, ne lectores illorum solum Gallum animo fingerent sententiam suam de hoc casu loqui non audere. Verum est me diu dubitasse essetne mihi adversandum opinioni duorum scriptorum quos alioquin maximi facio et aestimo, immo valde amo et diligo.

NEMO enim Gallos reprehendit quod quadamtenus nimis indulgeant ‘voluptatibus carnis’ et ideo querantur de rationibus justitiae Americanorum. At, optime Nemo, non ob illam causam de iis queruntur sed quia iis videtur homo, quisquis sit et cujuscumque sceleris accusatus, tractari non debere quasi jam damnatus esset. Nam apud nos viget lex ‘de conjectura innocentiae’ dicta, quae stricte prohibet etiam ne homo accusatus,, sed nondum damnatus, exempli gratia, appareat in photographematis ignominia notatus et manibus vinctis. Si haec vocatur ab amico nostro THERSITA hypocrisis Gallorum, respondebo hanc hypocrisin fructum esse cultus civilis, quo longe discessimus a barbarie quae legem Lynch vocatam olim invenit !

Si bellum Gallo-Americanum inde oritur, ut conjicere videtur Iconoclastes, ego pugnare paratus sum pro terra mea !

Pastrix

EPIGRAMMA DE CAEDE OSAMAE BEN LADEN

Pastrix — Mon, 09 May 2011 15:39:31 GMT

Laetificatus Obama fuit caede hostis acerbi,

Qui tantum annorum fugerat incolumis.

Gaudeat, exsultet merito ! verum caveat ne

Sit vivo gravior mortuus hostis atrox !

Pastrix

HIEMS ABIIT, EGO EO RVS

Pastrix — Sat, 23 Apr 2011 16:03:35 GMT

Vale, acris hiems ! Ave, ver novum ! Denique tandem sol terram calefacit, aura suavis flat sub puellarum castulis. Omnia reviviscunt. Venit mihi tempus ab urbano cultu et tumultu procul abeundi, et rusticam nostram domum petendi. Quae in Alpibus Septentrionalibus sita est. Ibi nulla televisio, fere nulla acta diurna, vix nobis radiophonum est, quod nobis nuntios a reliquis terris afferat. Ibi pax, quies, “mugitusque boum” ! Etiam interrete deerit, ita ut soli libri solitudini aliquid solacii praebeat. Sed quot et quales ! Nam multo plures sunt illic quam hic in domo urbana. Inter quos alios legere juvabit, alios relegere. Nam in dies magis me delectat relegere quam legere ! Quasi plura me inventurum nova sperarem in libris jam lectis, quam in recenter emptis. Et re vera ita persaepe mihi usu venit. Nam cum res in libro narratae legenti jam notae sint, nihilque festinare opus sit ad exitum noscendum, toto lectionis tempore uti licet ad gustandas singulas res cum in eventuum ordine, tum in agentium moribus et affectibus. Neque obliviscendum est, quod dicitur, lectorem fere haud minus creare librum quam scriptorem ipsum, ita ut, quomodo lector temporis lapsu sit mutatus , librum quoque re ipsa mutatum esse necesse sit.

Ergo valete, ad mensem Majum, cum in urbem rediero.

Pastrix