DE “ACOMOCLITISMO”
Nuper primum in actis quibusdam diurnis Gallicis hoc vocabulum legi quod omnino nesciebam, idque in symbola explicabatur his verbis : est usus, qui apud feminas in dies magis in morem venire videtur, habendi cunnum penitus evulsum aut rasum, utique omni pilo vacuum. Qui mos, si symbolae auctori credimus, ex pelliculis perductus est, quae pornographicae dicuntur, in quibus pleraeque mimae genitalia sua ostendunt omnino glabra. Fortasse quoque ortus est ex cupiditate in feminis natura insita, ut juniores et quasi impuberes videantur. Praeterea plerique viri dicuntur cunnum omnino aut fere omnino pilis vacuum malle quam pilosum et hirsutum, praesertim cum eum ore suo basiant et sugunt.
Nuper igitur inventum est hoc verbum, quo in hujus nuntii titulo usus sum, quod unde sit ductum exquirere properavi. Cujus etymologiam in Vicipaedia, illa celebri Encyclopaedia, tam utili et pretiosa, facile comperi. Illic inveni verbum, ut exspectabam, ex Graeco ductum, ubi invenitur ᾶλφα στερητικὀν (alpha privativum), deinde κὡμη (coma), denique κλειτορἱς (landica). Miror equidem curnam hic sit mentio de landica sola , cum ad genitalia tota res pertineat ? Cur non potius vocabulum κὑσθος (verbi gratia) usurpetur, quod cunno Latino accuratius respondeat ? Quod si nobis placeret, mos, de quo loquimur, verbo quod est “a-como-cysth-ismus” significaretur….
Pastrix