CONVENTVS HYPOCRITARVM
Nuper Romae convenerunt duo hypocritae et veteratores, scilicet Benedictus Romanus et Maledictus Gallus, qui inter se simulatione et dissimulatione decertarunt, unus fingens se oblitum esse reprehensionis (quam subsecuti sunt multi episcopi Galli), qua propter zingarorum vexationem paucis ante diebus Galliam petierat, alter pietatem humiliter simulans, cum omnibus notum sit eum fere nunquam missae dominicae adesse, immo uxorem post divortium duxisse, quod ab Ecclesia prorsus vetatur, qua de causa sine Carola, persona non grata (ut ajunt) apud papam, venerat. Nihilominus ter vel quater non sine ostentatione se signavit et orationem c.t. Pater noster palam recitavit. Vtrum a Deo sperat se adjutum iri ad novam electionem adipiscendam ? An potius confidit se catholicorum suffragia hac ridicula gesticulatione assequi posse ? Hoc plerisque opinionis publicae aestimatoribus valde dubium videtur. Vtinam recte praesagiant !
Pastrix