MIMVLA IN PELLICVLA
Scitisne Primam Gallarum Dominam, praesidis nostri histrionis uxorem, his diebus, Lutetiae, mimulae partes in pellicula agere, quam commentus est et regit clarissimus cinematographicus auctor Americanus Woody (Lat. Silvius ?) Allen ? Ita variis superioribus suis artificiis Carola nostra novam artem addidit: postquam enim fuit figura nuda ad usum photographorum, et multorum virorum femina, deinde vestium ostentatrix, et cantiuncularum cantatrix, ecce illa facta est mima, non invito, ut videtur, marito. Primum, puto, hominum memoria, uxor praesidis vel principis cujusdam in scaena aut in pellicula vulgi oculis se ostendit. Nam Gratia Monoecensis, exempli gratia, postquam principi nupsit, nullas partes unquam egit in pellicula, ita quoque fecit celeberrima Eva Peronis uxor Argentinensis, inter alias. Ergo nos Galli gloriari possumus quod Reipublicae nostrae praesunt histrio et mima. Vtinam ridendi occasionem, non flendi, nobis posthac praebeant !
Pastrix