04 mai 2008
Mensis Majus
Incepit tandem mensis Majus ! Post mensem Aprilem singulariter malignum, qui frigus, imbrem, nivem etiam, nobis fere singulis diebus attulit, verna tempestate frui tandem coepimus. Tempus profecto erat. Cottidie certe audimus viros meteorologiae peritos, omni occasione oblata, clamitare, maxima hominum culpa, temperaturam in toto terrarum orbe in dies calidiorem fieri, et hac de causa periculum humano generi imminere gravissimum, ne moles glaciatae in utroque polo adhuc rigentes aliquando liquefiant, adeo ut plurimae insulae et pleraeque urbes in litoribus sitae marium undis submergantur. Nos vero, eodem ipso tempore, de frigore querimur, et avide exspectamus dum tempestas mitior redeat, de futuro humani generis minime curantes. Qua in re, fateor, fortasse haud ita recte judicamus. ‘Quid ad nos’, inquimus, ‘si glacies polorum liquefiet. Ursorum phocarumque hoc interest, non nostra. Illi quidem viderint ! ‘. Sed interea diem carpamus, calore restituto fruamur, genio indulgeamus, vinum vel cervisiam frigidam, in sole recubantes, bibamus, ‘prosit’ invicem optato, avicularum cantu collaetemur. Quod vero ad nosmet ipsos pertinet, hoc vivendi modus cras desinet, nam redituri sumus ad Urbem, post ferias ruri exactas. Mihi quidem ipsi hoc minime molestum est, ut haud semel in diario hoc scripsi, nam vitam urbanam multo malo, quam rusticam, quanquam libenter fateor, interdum hanc non displicere, si non nimis diu patienda est….
Ergo ad proximam hebdomadem, optimi lectores et lectrices, optime valete.
Pastrix
Commentaires
De Vita Urbana
Apollonius Pastrici spd.
Valde miror qua ratione aliquis possit vitam urbanam praferre rusticae. Rure enim mea sententia aer purior est et quidem silentior quam in urbe ubi autoraedae et humana industria aures percutit et pulmones pulvere et gaso emissorio vehiculorum implet. Suavius in Tusculo!
Ad Apollonium
De aëre puriore et de silentio amoeniore tecum non dissentio, optime Apolloni, sed alioquin vita urbana habet multa commoda quae faciunt ut hic vivere malim quam illic....
Pastrici
Ipse in urbe habito sed malim in rure. Quondam rure laboravi pluribus aestatibus (1989-1996) apud tarandorum pastorem, cuius domus sita est in vico 5 domuum. In eodem viculo minus quam viginti homines habitabant - si etiam canes inter homines numeras..
Poster un commentaire
Rétroliens
URL pour faire un rétrolien vers ce message :
http://www.canalblog.com/cf/fe/tb/?bid=69475&pid=9056385
Liens vers des weblogs qui référencent ce message :