Neces politicae ...

Fere cottidie (vel quotidie, si mavultis : videte quid scripserit THERSITES in diario suo) audimus aut legimus de necibus politicis in variis regionibus perpetratis. Modo in Russia diurnaria quaedam, quae symbolas scribebat de rebus in Tsetsenia gestis, interficitur in domus suae anabathro. Nemo interfectorem novit, sed plerique commentatores suspicari videntur moderatores Russiae. De Iraquia loqui non opus est : cottidie homines tenues interimuntur, sed persaepe etiam homines majoris momenti, administri, magistratus, duces militares. Hodie etiam ante aliquot minutas audivi administrum quemdam Libananensem (Christianum Maronitam) et ducem partium Phalangistarum, nomine Petrum Gemayel, necatum esse, quae causa esse potest bellum civile renovandae in illa miserrima terra. Quis hoc novum scelus fecit ? Cui prodest ? Omnes oculi, ut fieri solet, in gubernatores Syriae et Iraniae se convertunt. Sed, ut ait proverbium Horatianum, "Quidquid delirant reges, plectuntur Achivi". Quis miserias novi belli civilis passurus est, nisi Libanenses ? Qui jam quindecim annos vixerunt in tali calamitate... Valete, optimi amici, et dormite in pace. Pastrix