29 octobre 2006
Tempora mutantur...
"Tempora mutantur et nos (vel: nos et) mutamur in illis". Hodie tamen non tempora, sed hora ipsa mutata est. Etenim praeterita nocte, cum esset hora tertia, regressi sumus ad horam secundam. Est quam appellant horam hibernam vel hiemalem, cum hora solum una Solem antecedimus. Videmur enim nunquam Solem respicere ! Aestate duae horae Solari tempori adduntur. Hoc nonne mirum est ? Licetne homini horas ita mutare arbitrio suo ? In aliis terrae regionibus, nefas esset tale consilium capere. In quibusdam terris Islamicis enim, exempli gratia, horae oriuntur a meridie uniuscujusque diei. Quod est multo commodius ad tempora quinque precum instituenda. In aliis, a Solis occasu oriuntur. In Europa vero mos mutandae horae bis quotannis servatur . Dicunt quidam hoc efficere solere aliquas turbationes in animis quorundam, imprimis puerorum, et, ut addunt, animalium. Fatendum est primis diebus post horae mutationem plerosque nostrum vehementer mirari quod nox citius venit quam solitum, sed mox nihil jam animadvertimus, adeo valet in nobis consuetudo.
Valete et dormite bene hac nocte, ut expergiscamini laeti et hilares.
Pastrix
Publicité
Publicité
Commentaires
P
N