Canalblog
Editer l'article Suivre ce blog Administration + Créer mon blog
Publicité
latine
26 octobre 2006

Paucorum improbitas...

Paucorum improbitas, universis calamitas (Pulblilius Syrus). Hoc proverbium nunquam magis veridicum visum est quam hodiernis diebus. Ubique terrarum moderatores civitatum improbitatis accusantur neque plerumque condemnantur. Frutex mentitus est et adhuc cottidie mendacia manifesta profert, nihilque eum impedire potest quin iter suum calamitosum pergat. Multi moderatores rerum publicarum Africarum se protinus venales praebent et in dies ditiores fiunt, palatia magnifica sibi aedificant, dum populi eorum omnibus rebus necessariis indigent. Etiam in terris Europaeis nostris, cottidie audimus hunc aut illum legumlatorem vel administrum publicum corruptelae reum fieri, a judicibus condemnari, et vix aliquot mensibus aut annis praeteritis, suffragia populi petere et... facile impetrare. Cives enim prorsus immemores maleficiorum erga se commissorum videntur ! Nisi forte malunt latronem quem norunt et qui, jam dives factus, fortasse a furtis amplioribus sibi temperabit, quam latronem novum adhuc pauperem et ideo cupidiorem divitias acquirendi ! De Frutice et ei similibus fortasse idem eveniet: populus mendaciis ejus assuetus fortasse anteponet mendacem sibi notum alicui novo candidato qui tam procaciter mentiri nesciet, et cives veritatis pericula subire coget. Valete, optimi lectores et lectrices, dormite bene et somniate de mundo justiore... Pastrix
Publicité
Publicité
Commentaires
N
Haudquaquam verum est id quod scripsisti alteris de candidatis qui tam procaciter quam Frutex mentiri nesciant. Omnes candidates nostri abundant mendacitate, et proxima in contione etiam Frutex non tam peritus erat mentiendi quam alternus, Johannes Kerri. Optimates et populares nostri, sicut (opinor) omnium gentium, mentiuntur—nonne Quintus Tullius fratri eius consilium dedit ita, ut mentiendo populi gratiam et suffragia adipiscatur? Et quid de Philippo, et Demosthene quoque? Qui moderator numquam est mentitus? Qui haud assidue?<br /> <br /> Sed in America, saepe difficile est aequo animo utro candidato favere, quod uterque est iniustus, et licet nobis modo duobus ex viris optare... et hi semper sunt viri, semper docti in universitatibus septentrionalibus in civitatibus, semper divites, semper antiquis ex familiis orti, semper Christiani: semper gemini sunt. Inter Frutecem et Kerri nulla erat optio vera nobis, ut multos iam annos Herbertus Marcuse praedixit. Cum optio est inter duobus modo (aut Kerri aut Fruticem, vel aut "nobiscum" aut "contra nos," aut "terrorem" aut "libertem") nulla est optio: qui rogavit et "optionem" proposuit, iam pro nobis optavit et omnes optiones alteras nobis abstulit.<br /> <br /> Audio vos in Europa posse multis ex candidatis moderatores vestros seligere. Multo iustius et tutius (et democraticius) hoc consilium mihi videtur. Utinam nos similiter sapiamus!
latine
Publicité
Publicité