Maledictus XVI

Pontifex Maximus Romanus imprudenter se gessit, cum aliquot tantum verbis fere funditus evertit aedificium diu et patienter ab antecessoribuss suis constructum quod erat quasi monumentum concordiae adhuc tenuis inter religiones Christianam et Mohametanam. Protulit enim in oratione in Germania patria sua habita locum ex controversia inter Imperatorem Byzantinum et Doctorem quemdam Theologiae Mohametanum saeculo quindecimo facta, in quo Imperator Christianus severiter rogabat collocutorem suum, dicens:"Quid novi attulit Mohametus vester praeter res malas et inhumanas, ut jus tuendi fidei suae gladio ?" . Oblitus est, credo, ille Imperator et, post eum, Benedictus noster, verborum Domini sui dicentis: " Hypocrita, eiice primum trabem de oculo tuo, et tunc videbis eiicere festucam de oculo fratris tui !" Quomodo enim, Christianismus, postquam factus est religio Imperii Romani, ceteris cultibus stricte prohibitis et punitis, subegit tot nationes, nisi gladio utens ? Carolus Magnus nonne vi militari populos totos ad baptismum coegit ? Et illa bella sub cruce suscepta, fueruntne ambulationes pacificae ? Et conversiones indigenarum in America incolentium coactae ? Et internecio eorum quos Ecclesia haereseos damnabat in Gallia, in Germania ? Ne commemorem scelera Sanctae Inquisitionis. Dicitur Benedictus esse theologus egregius, utinam satis probum historicum se praebeat ! Valete, optimi lectores et lectrices, et somniate de mundo meliore... Pastrix

Comments

[Nemo]

Saepe ei, qui nuntios in luce edunt, modo partim veritatem in luce ferunt, partim tenebris veritatem celant. Re vera nescio quid Benedictus ille dixerit, cum tantum unam sententiam illam legere potui. Textus integer a CNN vel aliis maioribus ephemeridibus non editus est.
In rebus πολιτικαίς in America, solemus modo frusta orationum, quae « morsus loquendi » nominantur, audimus. Quid moderatores cogitant, modo Laconico dictum esse oportet. Colloquia publica nostra ergo brevis et levis facta est; persaepe sententia excerpta totam orationem et oratoris philosophiam male repraesentat. Si de salacitate vel sultitiam vel vi tractat sententia excerpta, scilicet statim in televisionem identidem auditur et multos dies ingentibus litteris in ephemeridibus scriptis legitur. Persaepe contra senatores et moderatores nostras propter sententias male excerptas declamatur; nuntii videntur sicut ludus qui Germani "Kindergarten" appellant.
Suspicor pontificem nunc similiter patitur. Orationem de colloquia inter religiones habuisse fertur, sed sola sententia excerpta de odio et vi tractat. Opto CNN et alios nuntios orationes *integras* in luce edere; facile sit eis per interretiam hoc facere. Fortasse clarissima in luce integra veritas visa sit.

[Thersites]

Jam tres dies video nullos esse commentarios, de quo me ipse, lector assiduus sed piger, culpare possum. Hoc tantum haec verba mitto. Salvete omnes, quam benedicentissime