26 juillet 2006
De Democratia
Summatim non possum non assentiri tibi, MAXIME HISPANE, de democratia. Quae mihi quidem videtur et pessimus rei publicae status (ut ait Winstonius Churchill, in illa sententia saepissime citata, ceteris omnibus exceptis), et quo non possit inveniri melior. Pessimus est quia, in quolibet coetu fortuito, rarissime occurrit ut major pars congregatorum numero sit simul qualitate et peritia melior. Qua de causa saepenumero, si suffragia de eligendo ex duobus propositis, utrum magis placeat, feruntur, melius a pejore superetur. Democratia ipsa Atheniensis, quam tot et tanti homines, non indocti quidem, nobis exemplo et documento esse debere proclamant, non tam bene successit patriae suae, cum, duce Pericle, (qui tamen magis demagogus quam democrata fuisse videtur, et re vera populum magis secutus esse quam duxisse) bellum calamitosum adversus Lacedemonios suscepit. Tu, Maxime, opportune memoras Adolfum Hitler ipsum a majore parte populi sui ad summam potestatem prolatum esse, sicut plurimi 'duces' ejusdem generis. Nam qualis populus (certo saltem tempore et certis rerum condicionibus) talis 'dux'. Ceterum nihil impedit civitatem vere et rite 'democraticam' quominus foris imperiosa et vicinis regionibus maxime calamitosa fiat, cujus rei exempla ante oculos nostros nunc posita sunt. Sed infortunate, ut supra dixi, non mihi videtur inveniri posse ullus status rei publicae meliorem et probabiliorem.
Valete ad vesperam, nam haec scripsi medio postmeridiano tempore...
Pastrix
Publicité
Publicité
Commentaires
L
R