28 juin 2006
Mas an femina ?
Haec est quaestio jam dudum inter homines (et deos, ut videbimus!) proposita de mare et femina, uter sit beatior et fortunatior. Olim Graeci, qui de omnibus quaestionibus fabulas vel mythos fingebant, narrabant controversiam quondam natam esse in Olympo inter Jovem et Junonem de hac re. Juppiter enim, cum sorore-uxore sua jocans, dicebat : "Major vestra (id est: feminarum) profecto est // Quam quae contingit maribus ... voluptas" (Ov.Met.III, 320). "Illa negat. Placuit, quae sit sententia docti// Quaerere Tiresiae. Venus huic erat utraque nota." Etenim fertur vates ille clarissimus Tiresias quodam die mutatus esse in feminam, et sic septem annos mansisse, deinde rursus vir factus esse. Sic enim ei Venus utraque (id est: voluptas amatoria utriusque sexus) erat nota. Et quid respondit Tiresias ? " Dicta Jovis firmat". Significabat voluptatem femineam majorem esse quam voluptas masculina. Hoc responso narratur Juno iratissima fuisse, et hac de causa Tiresiam caecum reddidisse. Ego quidem non bene intellego cur Juno tam ira inflammatam se praebuerit. Quod ad me pertinet, si sexum meum eligere possem (quod infortunate, excepto Tiresia, nemini unquam contigit aut continget), perlibenter femina esse mallem. REGINAE NOCTIS poëmata, quibus tam eloquenter laudat et celebrat feminarum sortem, sententiam hanc confirmat. O fortunatas nimium, sua si bona norint, feminas ! (Et nunc illae pedifollio ludere possunt !!!)
Valete in crastinum, carissimi lectores et amatissimae lectrices , et dormite quam optime.
Pastrix
Publicité
Publicité
Commentaires
T
L
R