25 juin 2006
Superbia...
Heri Saturni die 24 m. Junii celebrabatur dies 'Superbiae homosexualium', quo complura centena milia hominum utriusque sexus (vel trium sexuum, nam intererant quoque homines qui transierant ab uno sexu in alterum, qui sese vocant 'transsexuales') per vias Lutetiae et aliarum urbium deambulabant, aut in carribus vehebantur plenis musicorum et saltatorum, ut exigerent aequalitatem inter homosexuales utriusque sexus et heterosexuales, in eo quod pertinet ad munera adipiscenda, ad matrimonium, ad adoptionem liberorum et ad omnia jura civilia. Quae jura iis jam tributa sunt in variis regionibus Europae, ut nuper in Hispania, quae tamen tam diu fuit exemplum morum severorum a Catholicismo oriendorum. Ego huic concursui interfui, in nomine libertatis qua omnes homines, mea quidem sententia, frui debent in amantibus suis eligendis, si eadem libertate illi fruuntur. Mihi quidem sunt amici et amicae in utrisque partibus et omnes mihi cordi sunt sine ullo discrimine. Nimium multa his temporibus prohibentur, undique pluunt interdictiones: vetatur considere in autocineto sine cinctura securitatis, vetatur transire viam extra tramites pedonibus paratos, vetatur calcare gramina publica, vetatur, vetatur.... Concedatur saltem ut amat quisque (quaeque) quem (quam) elegit arbitrio suo, sive virum sive feminam, ut eum (eam) incitat et impellit alma Venus, ejusque blandus puer Cupido...
Valete, omnes, et eos qui vos amant amate...
Pastrix
Publicité
Publicité
Commentaires
R
T
L