20 juin 2006
Solstitium...
Haec et proxima nox sunt brevissimae anni, nam congruunt cum solstitio aestivali, quando sol, ut aiunt, stare aut consistere videtur. In nostris regionibus scilicet, nam in altera parte orbis terrarum hodie incipiet hiems. Ergo Regina nostra, si vult augere regnum suum, debebit migrare in hemispherium meridionale. Hic enim, sed praesertim in terris magis septentrionalibus, ut in urbe Petropoli in Russia, sed etiam Lubecae, ubi vivit noster Caputsaxiens, tempus ejus regni omnino deminutum est. Ne anxii tamen simus de ejus sorte, Regina illa quidem Noctis est, sed regnum ejus longius et latius patet. Et illa deminutio non diu durabit, nam ex die postero iterum diurnum tempus versa vice brevius fiet, et nocturnum longius. Ita volvitur annus...Sed corda nostra non cognoscunt has vicissitudines. Amor noster non pendet ex tempore anni, neque ex longitudine aut brevitate noctium...Et, si noctes praeferimus propter somnia dulcia quae nobis afferunt, nonne nobis licet somniare interdiu suaviter jacentes sub sole ? Haec sunt vota mea quae facio pro vobis et pro me ipso...
Valete, fideles amici et amicae, et celebrate festive et hilariter solstitium aestivale.
Pastrix
P.S. Valde mihi placuit commenterius tuus, optime Caputsaxiens, plenus sententiarum vere sapientium...
Publicité
Publicité
Commentaires
L
R
L
R
T