14 juin 2006
Calor, calor
His diebus, post hiemem quae longior solito visa est, postque ver quod modo frigidius modo calidius aequo videbatur, intravimus, (Lutetiae quidem, in aliis regionibus ubi lectores nostri habitant, nescio), in tempestatem plus quam aestivam, quae movet anxietudinem multorum, qui infortunatae aetatis anni MMIII meminerunt. Illa enim aestate, temperatura altissima per tempus non modicum adeo debilitavit et oppressit multos senes et anus, ut quindecim milia eorum e vita decesserent, maturius, ut tum affirmatum est, quam natura et aetas eorum requirere videbantur... Quod effecerat ut gubernatores Galliae paenitentiam suam publice exprimerent, quod non maturius animadvertissent calorem nimium, imprimis in nosocomiis seniores hospitio excipientibus, propter inopiam instrumentorum aëri temperando, causam esse posse obitus eorum. Quid hac aestate eveniet ? Nescimus. Sed jam audivi commentatorem quemdam (Gallum, scilicet!) affirmantem gregem Gallicum non potuisse vincere Helvetios in certamine hesterno, "quia Gallis calor nimius molestissimus fuisset", quasi non eadem temperatura Helvetios attigisset ! Miseros Gallos ! quibus Natura rerum novercam tam iniquam et injustam se praebet !!!
Scripsi hodie maturius solito, quia conclave ubi est ordinatrum meum ab hospitibus nocte occupatur. Quod puto quoque eventurum esse cras et fortasse postero die...
Valete, carissimi amici et amicae, et dormite bene.
Pastrix
Publicité
Publicité
Commentaires
L
T
T
R
R